مذكرات شاب سعودي في لندن

من طرف ابوشهاب الإثنين أبريل 12, 2010 2:58 am

مذكرات شاب سعودي في لندن

في صيف 96 وبعد ان انهيت اول سنة جامعية لي قررت ان اسافر للمملكة المتحدة بغرض السياحة وتعلم لغة الانجليزية .وطبعا هالكلام ماجاز للاهل من ناحية اني باسافر بروحيوانا اللي عمري ما سويتها في وسط المملكة علشان هالمرة اروح لندن,ولكن ربكم سهل وقدرت اقنع الاهل بالفكرة ووافقوا المهم المشكلة مو هناالتفاصيل في الطريق اليكم.

مالقيت حجز من الرياض وانا تذكرتي درجة اولى بل مالقيت من اي مكان وبالواسطة وحب الرووس والامريكان لقيت لي مقعد سياحي ومن جدة فسافرت يوم الخميس الليل الى جدةواستقبلني اخوي ويوم الجمعة رحنا للمطار من اجل السفر,مريت بكاونتر الجوازات وابتسامتي تشق وجهيمن الفرحة واعطي الضابط الجواز وبما ان عمري كان 17 طلب الضابط ورقة موافقة ولي الامر هنا استل عنتر اللي هو انا سيفه واخرج الورقة قراها الضابط والا يرميها بوجهي ويقول وش ذا اثري ما ادري عن النظام ياحليلي كاتب الورقة في بيتنا ومخلي ابوي يوقعهاالمهمجلست احلف للضابط ان هذا توقيع ابوي واخوي يحلف معي بعد ولاوافقوا الى ان تعهد اخوي ان يجيبها لهم واعطاهم بطاقته ورخصته ونظارته كضمان المهم وافقوا وصعدت الى الطائرة.

كان كل حلمي ان تركب جنبي بنت شفتوا شلون حلمي بسيط وحققه الله ,ربي يحبني مو بنت بنتين قصدي شغالتين فلبينيتين وقدامي ولد هندي شاب بار باهله معه عجوز وشايبومن زود برة في امه العجوز اللي جالسة قدامي رجع الكرسي على بكرة ابيه الى ان تصاككت ركبّي وصرت كاني في محكر بس الله هدى احدى المضيفات وجت وقالت لهم صلحوا الكرسي الى ان تطير الطيارة.جواب مطمئن.

سبع ساعات من الرحلة السعيدة استبدلت فيهم معزبة الشغالتين الشغالتين باولادها اللي يبون يجون عند النافذة(الطرف) ماعلينا ...وصلنا لندن ولاني ماعرف وش السواة في مطار هيثرو مشيت مع الخلق(ومع الخيل يا شقرا)وجلست ادور السواق اللي بينتظرني وشفت اسمي مكتوب على لوحة شايلها واحد طوووويل ولاني مو طويل مرة يعني قصير جلست انطنط قدامه واقول (يس يس ثاتس مي ايم هير)الانجليزي اللي عندي شافني وكانه مو مقتنع بشكلي سلم علي وخذني بيدي وجلسنس على كرسي وقااال انتظر باقي اثنين 5 دقايق والا انه جايب واحد معه وقال هذا صديقك جلست انا والاخ(من تركيا)ندردش ..ترقيع انجليزيوجا بعد 10 دقاي معه بنت وقال لنا يالله خلاص اكتملتوا ورحنا معه يمّ السيارة وقال من بيركب قدام جنبي من من من انا 17 سنة والا باريش التركي 21 ,طبعا لاذا ولاذا النرويجية ام 12 سنة يالله اتيكيت .المهم وانا في السيارة والا ذاك الطر والبساط الاخضر على كل جهة واذا بعنتر اللي هو انا يستل سيفه المقدام(كاميرته)ويبرزها بشكل علني ويبدا في التقاط الصور السواق من الروعة بغى يصدم(what r u doing sir) قلت له(take photo)قال لي عندك وقت طويل تاخذ صووور فيه واسمعوا اغرب جواب في الحيااة البشره(هههه i have a lot of films)المهم السواق تحمد ربه بس ما ادري على ايش.واوصل الى البيت المقرر ان اسكن فيه
ودق السواق الباب وفتح رجال طوووووويل اطول من السواق الباب وشكله يروع شعره طوويل وما كده واسنانه تخوف واللي قاهرني انه كان يبتسم وجلس يتكلم مع السواق وتطلع بعد ديقة حرمة مو احسن ولا احلى منهوعرفت ان هذا قدري ان اعيش معهم.ويعزموني على الدخول ويقوم ذاك الطوويل بحمل حقائبي حلوة حقائبي احرجتكم ..وادخل وتجلس الحرمة الطويلة تعلمني وتوصف لي البيت ومن الروعة نسيت الانجليزي كله صرت كاني اطرم ماغير (اااههه واااممم) وعرفت منها ان ذاك الطويل هو البوي فريند حقها وانها مطلقة ودخلنا الصالةواذا باولاد كلهم اطول مني واحد منهم ولدها وكان يتنطنط على البوي فريند حق امه صدق ولد بار بامه ما اطول عليمك سالتني وش ودك تسوي من غير وعي قلت انووم والله من الروعه وذهول المفاجاة كنت احلم بربة بيت شكل ثاني يعني بصراحة احلى ورقيت غرفتي ونمت من الساعة 8ونص الليل.

قمت صباح يوم السبت مبكرا وجلست في غرفتي انتظر اسمعهم يصحون ,ولما سمعت اصوات نزلت وافطرت وبديت اتاقلم على الوضع الجديدالى الساعة 11 حيث ابتدت النكباات جت صديقة معزبتي الجديدة واحدة طول مناااسب وشكل جذاب حلوة بصراحهاوجلست تسولف مع صديقتهاقلت بروح الصالة (بدت انجليزيتي ترجع لي)ورحت وكلها دقيقتين وتجي عندي صديقة معزبتي وتجلس على الارض وانا على الكنبه وتتسند على كرسيي من شفت هالمنظر تقرفصت بمكاني(ايه خويتها لابسة بنطلون وبلوزة على شكل السفاري طقم)وجلست تسولف معي وانا منلخم اسئلتها ذمرتني باختبار الانجليزي الشفوي وفجاة قالت الجو حر وتفصخ البلوزة والا انا ابلّّم ذيك التبليمة وابزر العيون وركبّي قامن يتصاككن ويتنافضنواثرها لابسه (اندر وير للصدر بشكل الطقم)وجلست تكمل اسئلتها وانا وشوي واعرق الى ان جا البوي فريند حق معزبتي ويطلع للحديقة وتطلع صديقتها معه قلت الحمدلله وجلسوا يسولفون ويضحكون وانا اطالع واقوول خيانة,وتنادي معزبتي البوي فريند حقها ويروح لها في المطبخ وتبقى ذيك وتجلس تناظر فيني وتضحك والا هي تفصخ البنطلون (وهي لابسة تحته شورت من نفس الطقم لابارك الله فيه من طقم)وترجع عندي في الصالة وتكمل اسئلتها وانا اللي ابدى بالعرق والتصبب وقرفصت هالمرة بزووود واعصابي تلفت وقمت انقص من كل كلمة حرف(اي وس ,مي هم,مي مذر)حكي مادري وشلون شكله المهم وتقوم ترقص قدامي او بمعنى اصح تسوي حركات رقص وقالت لي انا رقااصة (قلت في نفسي فيفي عبده)واثرها تقول راقصة في فرقة مسرحية ما اطول عليمك نادتها معزبتي وما امداها راحت لها والا انا اطمر لغرفتي بصراحة شريت عمري الاولى والثانية سليمة اما الثالثة مايندرى وش يصير.

خلصت هالهوجة من اللخبطات والتلعثمات وجلست في غرفتي حوالي ساعتين واسمع صوت ولد معزبتي واصدقئه معه وراحو لغرفته اللي قبال غرفتي وقاموا يشغلون المسجل بصوت عااالي وصراخ وهبال المهم مليت من غرفتي قلت باطلع وافتح باب غرفتي اللي هي قبال باب دورة المياه والا الطامة الكبرى واشوف واحدة من صديقات الولد وهي في دورة المياه وتاركه الباب مفتوح المسكينة كانت تصلح ملابسها الداخلية انا من الروعه اول مافتحت الباب وشفتها والا اصكه وبقوة...كاني انا اللي فاتح عليها الباب وجلست ورى الباب اقول لنفسي افتحه والا لا جلست 3 دقايق افكر قلت لنفسي ياولد اشتر عمرك وارجع لديرتك اصرف لك وشوي وافتح الباب والا البنت قد خلصت تعديلاتها وطلعت وقالت لي هاااااي (اول مرة واحدة تقول لي هااي من يوم خلقني الله)واتنح فيها ومشت والتفتت يمي وقالت لي(r u happy here)قمت اقول يس يس والله العظيم يس وهي تضحك وانا اقول لنفسي (زي اي شاب سعودي في مثل هذا الموقف)

وضع في هذا الموقف شكلها حبتني,المهم مر يوم السبت اول يوم ر في لندن على هالاشياء واحكموا هي خير ولا شر ونمت وانا احلم بصديقة معزبتي ساعة وصيقة ولدها ساعة ثانية
المهم رحنا يوم السبت اقصد الاثنين اول ايام الدراسة وسووا لنا اختبار تحديد المستوى وكان فيه مقلب حيث خلونا صفين متقابلين وقدامي اجمل 6 بنات يعني جلست اطير عيوني فيهم وادعي الله يخليهم معي في الصف بس ايه هين مش خشمك جلست في فصل مافيه الاواحدة حليوة والباقيات صفة كوريات وتايوانيات المهم لاتخافون ماصار في المدرسة مواقفالا اللهم اول واحد تعرفت عليه كان اسرائيلي واعز صيقاتي كانت صربية وصدقوني صدقوني كانت غير مقصودة.والا تبون الصراحة تقريبا كان كل يوم شي يفشل من هالايام نهاية الشهر الاول نص اللي كانوا معنا كانوا من الامريكين الجنوبيينوبيروحون بعد شهر قالت المدرسة بنسوي حفلة وداع نزلت وانا اضحك وادخل الصالة الكبرى والا احس اني داخل قاعة ضحايا قنبلة هيروشيما بنات يصيحون واولاد يبكون ويحضنون البنات قلت لنفسي ياولد صحيح انك بتجلس شهر ثاني بس ودع مع اللي يودعون وفعلا صفيت صورة من هنا وحضن من هناو(.....)من هنا وربكم كريم صار لي ذاك اليوم تشبع فوق العادة.كان هالكلام يوم الجمعه ويوم الاثنين اللي بعده صار حفل استقبال لطلاب الشهر الجديد وبما اني صرت خبير فكنت مرشح اصير عريف امزح معكم بس كان هالشي يحسب لي مع الطلاب الجدداقصد الطالبات وفعلا تعرفت على الصربية (كريستينا) صح انها اكبر مني بثلاث سنين بس خبلة وكونا فرقة خبال في المدرسةمن الاشياء اللي كنا نسويها كنا نوقف عند محطات توقف الباصونهبل بالعجز البريطانيات نسوي نفسنا نتكلم لغة اوربية او لغة غريبة واحنا نخربط ونهذر بصوت مرتفع المهم مابي اطول عليكم راح اذكر لكم بعض المواقف المتفرقة

1 رحت انا وواحد عجوز يسكن معي في نفس البيت ويدرس معي نتمشى في اول ويكاند وياليتنا مارحنا هو معه خريطته ويبينا نمشي مشينا وتكسرت رجولنا 6 ساعات مشي وضعنا وهو مصر ان نعتمد على الخريطة انا وقتها فاض فيني وقمت اصارخ في الشارع واقول احنا لازم نسئل الناس وناخذ باص تاكسي طيارة اي شي وفعلا تطاقينا ولولا فرق العمر كانت وصلت بينن بالايادي ركبنا باص انا في اخره وهو في اوله بس يستاهل بعدها حرم يقول وش رايك نروح مع بعض

2 رحنا لرحلة في بااص لمكان ما اذكره البلا اني اتاخر واللي يصعد متاخر يخسر جلست جنب عجوز سويسرية تتميلح مسوية نفسها ام 18 سنة ولان اخوكم يبي يسوي نفسه ذرب قمت اجاملها وامدح فيها وهي ما صدقت قامت حشرتني باسئلة لين كرهت عمري وقفنا في مطعم ما صدقت نزلت ولا ركبت الا لما تاكدت انها انضفت في كرسي وابتلى بها واحد غيري

3الهايد بارك عشقي سنين وانا اسمع عنها ماصدقت على الله اروح لها وانصى السبيكرز كورنر (زاوية المتكلمين)والا اشوف عالم تهذر هذا مسيحي وهذا مسلم وهذا يهودي

واحد يسب في بريطانيا والثاني في امريكا والثالث في الاسلام قصة طويلة انا انبسطت تشققت هناك تشقق ماتتصورون كيف ومن الاشياء اللي صارت شفت معارضة لدولة خليجية(...) قمت اناقشهم على بالي مادريت الا اللي يصورني ساعتها جلست يومين انتفض وما اعرف وش بيصير ترى الخوف ان الصورة تطلع شين لااكثر ولا اقل

وبعد شفت عراقيين يكسرون الخاطر على بالهم واللي يشتم في صدام واللي يتشكى فراق اهله ومادريت الا تطاقوا فيما بينهم وش القصة يا شباب اثرهم كل واحد له مذهب وفي الاخير حكي اعقلهم مادري اهبلهم من يبي يصير ريّس الغريب ولاواحد رفع يده

4في مطار هيثرو شي من اطرف القصص جيت قبل الرحلة باربع ساعات يعني 7 ساعات قبل الاقلاع نوع من الاحتياط تغديت هناك تمشيت في سوق المطار وانقضى الوقت ومادريت الا انهم ينادون للرحلة وادخل في صالة السعودية قبل الرحلة بساعة والا واحد من الكبار يعني لاتفهموني غلط

يمكن ابو الطيّار او مضيفة يدق عليهم ويقول بنتاخر ساعة ويعلنون بشكل غير رسمي هالشي اخوكم الان بيبدع...عطشت وابي اشرب مويه ادور براده مالقيت يمين يسار سئلت المسئول المصري قال مافيش يا سعادة البيه قلت له والحل قال ماعرفش قلت له بروح اشتري من السوق اللي برا اقصد السوق الحرة قال لا قلت ليه وبين لاوليه مشى كلامي بس قال لي هات تذكرتك كنوع من الاحتياط لو ماجيت بننزل شنطك قلت انتم فتشتوها قال لي اهوده النظام يا سعادة البيهعطيته التذكرة ورحت من نفس الطريق اللي دخلت معه والا شرطيين طوواااال يقولون لي فروم ذاااااات واي

يعني من هناااك واروح حوالي ربع ساعة مشي والا نقطة تفتيش ويسئلوني (وات دو يو وانت سير)قلت من الروعة واتر واتر واتر رئيسهم ماهضمني قال حط كل اللي معك وقال لشرطية تفتشني تفتيش شبه ذاتي باليد يعني وهي تفتش واخوكم القروي يضحك لانه حياوي على خبركم وبعد كل هذا عديتهم بعد ماكلم احد الضباط رئيسه يمكن قال له شكله سبهه المهم دخلت السوق الحرة اللي كنت فيها واطمر واجيب لي علبة مويه كبيرةوباحاسب قالت لي البياعة وين التذكرة قلت خذوها مني قامت بادب خذت المويه وقالت(سوري...)قلت لها (بت ..بت..بت)بعد هالبتبته واشرح لها قالت لي (بلييز ويذاوت تيكت اي كانت سيل يو اني ثينق)قلت لها اخر كلام ابتسمت لي قلت انطمي تكفين بالعربي ورحت من جديد لصالة السعوديةفارس مكسور سيفهانتظر اركب الطيارة واول ماركبت طمرت بين المضيفات زجلست اشرب مويه حوالي 6كؤوس مويه وعزمت مضيفة على حلاو كان معي قالت لي انا احافظ على وزني شكرا وكان جنبي في الطيارة اثنين شباب شكلهم طفروا قاموا يناظرون فيني اني اعزمهم واخوكم ولا عبرهم وهو ياكل في الحلاو حقه

5 في احد الايام الجميلة نزلت وسط لندن اتمشى واذا انا في البيكاديللي اشهر شارع هناك ومنشغل فيه ولاانا الف في حارة واشوف ناس غير ومحلات غريبة سئلت واحدة مشخلعه مرت من عندي قلت لها وش اسم هالمنطقة ضحكت ومشت واستمر في المشي للداخل والا محلات صغيرة ومتواضعة بس مافي منها في السعودية ولادول الخليج ولا ذاك المحل على بابه بنت قال (كوم ان سير)جلست اتلفت ساعة اشوف هي من تقصد ولا به انا قلت مي ماكنت اعرف النظام والفكرة واروح لها عاد سعودي نادتته واحدة يقول لا مشوا خشومكم واطل من المدخل واشوف اشياء حلوة رطبهولا تقول لي اللي على الباب (وات دو يو لايك)قلت مي نوثينق نوثينق وعزمت علي مرة ثانية كنت على جريف لولا الله ثم اني شفت واحد اسود وجثه ناصي المحل قلت اشوف وش بيصير الا هو طلع السيكيورتي حق المحل فهمت ان الدعوة متعقدة وان فيها فلوس بدل خدمة اول تقدرون تقولون بدل رطوبة وما انا الا اللي عاط من المكان في دقيقة والحرمة تضحك والعبد الاسود يضحك المهم شفت محل صغير زي محل بيع الهدايافي اول الحارة وادخله والا هو زي خويه الاول بس هدايا بس يعني مافي رطوبة لو انا كذاب باقول لكم مادخلته الحقيقة دخلته وفشلتهم كل ما شفت شي جلست اضحك ولا مسكت نفسي وجا رجال شايب نصى طاولة عليها(.....)ايه كانت معه حرمة شيفة والا الشيبة هو والسيدة اللي معه يعاينون ....وانا فاطس على نفسي من الضحك وينتبه لي ويرمي اللي في يده ويطلع ويكلم راعي المحل اللي جاني بعد دقيقة يسئلني انا وش فيني وهل انا سكران عرفت الدعوه خربان قلت له بلغة الواثق من نفسه(اي ويل نوت باي اني ثينق فروم يو)ومشيت يعني لو ماجاني كنت باشتري طبعا لا الا كذا

انتهت